കേരളം ഒരു നിയമസഭാ തിരഞ്ഞെടുപ്പിന്റെ ഫലപ്രഖ്യാപനത്തിനായി ശ്വാസമടക്കി കാത്തിരിക്കുന്ന ഈ നിമിഷങ്ങളിൽ, ജനവിധിയേക്കാൾ ഉച്ചത്തിൽ കേൾക്കുന്നത് അധികാരത്തിന്റെ ഇടനാഴികളിലെ പിറുപിറുപ്പുകളും പടലപ്പിണക്കങ്ങളുമാണ്. വോട്ടുകൾ പെട്ടിയിലായിക്കഴിഞ്ഞു, ജനങ്ങളുടെ തീരുമാനം മുദ്രവെക്കപ്പെട്ടു. എന്നാൽ, ആ ജനവിധി എന്തുതന്നെയായാലും, തങ്ങളുടെ അധികാരം എങ്ങനെ ഉറപ്പിക്കാം എന്ന തത്രപ്പാടിലാണ് രാഷ്ട്രീയ നേതൃത്വങ്ങൾ. പ്രത്യേകിച്ചും യു.ഡി.എഫ് കേന്ദ്രങ്ങളിൽ മുഖ്യമന്ത്രി പദത്തെച്ചൊല്ലി ഉയരുന്ന ചർച്ചകൾ കേവലം ജനാധിപത്യപരമായ സംവാദങ്ങൾക്കപ്പുറം ഒരു തരം 'കൊട്ടേഷൻ' രാഷ്ട്രീയത്തിന്റെ സ്വഭാവം കൈവരിച്ചിരിക്കുന്നു എന്നത് അങ്ങേയറ്റം ഗൗരവകരമായ സാഹചര്യമാണ് സൃഷ്ടിച്ചിരിക്കുന്നത്.
കേരളത്തിന്റെ രാഷ്ട്രീയ ചരിത്രത്തിൽ കഴിവുള്ള നേതാക്കൾക്ക് അർഹമായ അവസരങ്ങൾ നിഷേധിക്കപ്പെട്ട ഒട്ടനവധി സംഭവങ്ങളുണ്ട്. കെ.എം. മാണി എന്ന അതികായനായ രാഷ്ട്രീയ നേതാവിനെ നാം ഉദാഹരണമായി എടുക്കുകയാണെങ്കിൽ, അദ്ദേഹത്തിന്റെ ഭരണനൈപുണ്യവും സ്വീകാര്യതയും വെച്ച് നോക്കുമ്പോൾ ഒരിക്കലെങ്കിലും അദ്ദേഹം ഈ കേരളത്തിന്റെ മുഖ്യമന്ത്രി പദത്തിൽ ഇരിക്കേണ്ടതായിരുന്നു. എന്നാൽ പലപ്പോഴും തന്ത്രപരമായ നീക്കങ്ങളിലൂടെയും ഗ്രൂപ്പ് സമവാക്യങ്ങളിലൂടെയും അത്തരം വ്യക്തിത്വങ്ങൾ തഴയപ്പെട്ടു. പകരം വന്ന പലരും ആദർശത്തിന്റെ മുഖംമൂടി അണിഞ്ഞവരായിരുന്നു എങ്കിലും ഭരണപരമായ വലിയ പരാജയങ്ങൾ ഏറ്റുവാങ്ങിയവരായിരുന്നു. കഴിവുള്ളവരെ മാറ്റിനിർത്തി കഴിവില്ലാത്തവർക്ക് പരവതാനി വിരിക്കുന്ന ഈ രീതി കേരളത്തിന്റെ രാഷ്ട്രീയ ശാപമായി ഇന്നും തുടരുന്നു.
ഇന്നത്തെ കോൺഗ്രസ് രാഷ്ട്രീയത്തിൽ നാം കാണുന്നത് ഇതിന്റെ മറ്റൊരു പതിപ്പാണ്. ഒരു കാലത്ത് ഗ്രൂപ്പ് പോരുകൾ രാഷ്ട്രീയ നിലപാടുകളുടെ അടിസ്ഥാനത്തിലായിരുന്നെങ്കിൽ, ഇന്ന് അത് സൈബർ ഇടങ്ങളിലെ അശ്ലീലമായ കടന്നാക്രമണങ്ങളായി മാറിയിരിക്കുന്നു. വോട്ട് എണ്ണുന്നതിന് മുൻപേ തന്നെ മുഖ്യമന്ത്രിയാവാൻ കുപ്പായം തുന്നി നിൽക്കുന്ന നേതാക്കൾക്കായി അവരുടെ അനുയായികൾ സോഷ്യൽ മീഡിയയിൽ യുദ്ധം പ്രഖ്യാപിച്ചിരിക്കുകയാണവി.ഡി. സതീശൻ എന്ന നേതാവ് കഴിഞ്ഞ അഞ്ചുവർഷം പ്രതിപക്ഷത്തെ നയിച്ച രീതി നാം കണ്ടതാണ്. പാർട്ടി തകർന്നു തരിപ്പണമായി നിന്ന ഘട്ടത്തിൽ, ഒരു സാധാരണ പ്രവർത്തകൻ പോലും ആത്മവിശ്വാസം നഷ്ടപ്പെട്ട അവസ്ഥയിൽ നിന്നാണ് അദ്ദേഹം ടീം യു.ഡി.എഫിനെ പടുത്തുയർത്തിയത്. സമുദായ സംഘടനകളുടെയും ന്യൂനപക്ഷ വിഭാഗങ്ങളുടെയും ഇടയിൽ അദ്ദേഹം നടത്തിയ ഇടപെടലുകൾ രാഷ്ട്രീയമായ ഒരു 'സോഷ്യൽ എൻജിനീയറിങ്' തന്നെയായിരുന്നു. ഇതിനെല്ലാം പിന്നിൽ പ്രവർത്തിച്ച ഒരാൾക്ക്, അധികാരം ലഭിക്കുമ്പോൾ അതിന്റെ നായകസ്ഥാനം നൽകുക എന്നത് ഒരു 'സ്വാഭാവിക നീതി'യാണ്. എന്നാൽ ഈ നീതിയെ അട്ടിമറിക്കാൻ ഇപ്പോൾ ഗൂഢമായ നീക്കങ്ങൾ നടക്കുന്നു എന്ന സംശയം ശക്തമാണ്.
മത്സരരംഗത്തില്ലാത്ത നേതാക്കളുടെ പേര് മുഖ്യമന്ത്രി പദത്തിലേക്ക് വലിച്ചിഴക്കുന്നത് ഇത്തരം ഗൂഢാലോചനയുടെ ഭാഗമാണ്. കെ.സി. വേണുഗോപാലിനെപ്പോലെയുള്ള ദേശീയ നേതാക്കളുടെ മഹത്വം പാടി സൈബർ ഇടങ്ങളിൽ പോസ്റ്റുകൾ നിറയുമ്പോൾ, അതിന്റെ പിന്നിലെ ലക്ഷ്യം വി.ഡി. സതീശനെന്നോ രമേശ് ചെന്നിത്തലയെന്നോ ഉള്ള പ്രാദേശിക നേതൃത്വത്തെ അസ്ഥിരപ്പെടുത്തുക എന്നതാണെന്ന് വ്യക്തം. ഇതിനായി കോൺഗ്രസ് നേതാക്കൾ തന്നെ സൈബർ കൊട്ടേഷൻ സംഘങ്ങളെ ഉപയോഗിക്കുന്നു എന്നത് ലജ്ജാകരമാണ്. കെ. സുധാകരനെപ്പോലൊരു മുതിർന്ന നേതാവിന് തന്റെ ഫേസ്ബുക്ക് കമന്റ് ബോക്സ് ഓഫ് ചെയ്യേണ്ടി വരുന്ന സാഹചര്യം ഈ അരാജകത്വത്തിന്റെ ആഴം വെളിപ്പെടുത്തുന്നു. പാർട്ടിയെ അധികാരത്തിൽ എത്തിക്കാൻ വെയിലും മഴയും കൊണ്ട് ചുവരുകളിൽ പോസ്റ്റർ ഒട്ടിച്ച സാധാരണ പ്രവർത്തകരെ പരിഹസിക്കുന്നതാണ് നേതാക്കളുടെ ഈ കസേരക്കളി.
ഘടകകക്ഷികളുടെ വികാരവും ഇവിടെ പരിഗണിക്കേണ്ടതുണ്ട്. മുസ്ലിം ലീഗ് പോലുള്ള പ്രബലമായ കക്ഷികൾക്ക് അർഹമായ പരിഗണന നൽകാത്തത് മുന്നണിയുടെ ഭാവിയെ ബാധിക്കും. പി.കെ. കുഞ്ഞാലിക്കുട്ടിയെപ്പോലൊരു നേതാവിന് ഭരണം നയിക്കാൻ അവസരം നൽകിയാൽ അദ്ദേഹം എങ്ങനെ ഭരിക്കുന്നു എന്ന് നോക്കി പഠിക്കാൻ കോൺഗ്രസ് നേതാക്കൾ തയ്യാറാകണം. അഞ്ചാം മന്ത്രി വിവാദമൊക്കെ ഉണ്ടായപ്പോൾ കോൺഗ്രസ് കാട്ടിയ പക്വതയില്ലായ്മ രാഷ്ട്രീയ കേരളം ചർച്ച ചെയ്തതാണ്. ചെറിയ പാർട്ടികളിലെ വലിയ നേതാക്കളെ അംഗീകരിക്കാൻ കോൺഗ്രസ് മടിക്കുന്നത് എന്തിനാണ്? ജനാധിപത്യത്തിൽ കൂടുതൽ സീറ്റ് കിട്ടുന്നവർക്ക് മാത്രമേ മുഖ്യമന്ത്രിയാവാൻ അവകാശമുള്ളൂ എന്ന് ഒരിടത്തും എഴുതിവെച്ചിട്ടില്ല. ഭരണപാടവമാണ് പ്രധാനം.
മറ്റൊരു പ്രധാന വശമെന്നത്, യു.ഡി.എഫിന് അനുകൂലമായി വോട്ടുകൾ ലഭിച്ചിട്ടുണ്ടെങ്കിൽ അത് ഭരണപക്ഷത്തോടുള്ള കടുത്ത രോഷത്തിന്റെ ഫലമാണ് എന്നതാണ്. പിണറായി വിജയന്റെ പത്തുവർഷത്തെ ഭരണത്തിൽ മനം മടുത്ത ജനങ്ങൾ ഒരു മാറ്റത്തിനായി വോട്ട് ചെയ്തിട്ടുണ്ടെങ്കിൽ, അത് യു.ഡി.എഫ് നേതാക്കളുടെ സൗന്ദര്യം കണ്ടിട്ടല്ല. ആ നെഗറ്റീവ് വോട്ടുകളെ തങ്ങളുടെ വ്യക്തിപരമായ വിജയമായി കാണുന്ന നേതാക്കൾ ജനവിധി വരുന്നതിന് മുൻപേ തന്നെ പരസ്പരം കടിച്ചു കീറുന്നത് കാണുമ്പോൾ ജനങ്ങൾ പുച്ഛത്തോടെയാണ് ഇതിനെ നോക്കിക്കാണുന്നത്. തിരഞ്ഞെടുപ്പ് ജയിച്ച എം.എൽ.എമാരും ഹൈക്കമാൻഡും ചേർന്ന് എടുക്കേണ്ട തീരുമാനങ്ങൾ സോഷ്യൽ മീഡിയയിലെ കൊട്ടേഷൻ സംഘങ്ങൾ തീരുമാനിക്കുന്ന അവസ്ഥാവിശേഷം കോൺഗ്രസിന്റെ അടിവേര് തോണ്ടുന്നതാണ്.
തമിഴ്നാട്ടിലും കർണാടകത്തിലും രാജസ്ഥാനിലും നാം കണ്ട കാഴ്ചകൾ ഇവിടെയും ആവർത്തിക്കപ്പെടുകയാണ്. പണക്കൊഴുപ്പും വ്യക്തിപരമായ സ്വാധീനവും ഉപയോഗിച്ച് അധികാരം പിടിച്ചെടുക്കാൻ ശ്രമിക്കുമ്പോൾ നഷ്ടപ്പെടുന്നത് പാർട്ടിയുടെ വിശ്വാസ്യതയാണ്. കർണാടകത്തിൽ ഡി.കെ. ശിവകുമാറും സിദ്ധരാമയ്യയും തമ്മിലുള്ള തർക്കം പരിഹരിക്കാൻ ഹൈക്കമാൻഡ് വിയർപ്പൊഴുക്കുന്നത് നാം കാണുന്നു. കേരളത്തിൽ അത്തരമൊരു സാഹചര്യം ഉണ്ടായാൽ അത് യു.ഡി.എഫിന്റെ പതനത്തിന് തന്നെ കാരണമാകും. കാരണം, കേരളത്തിലെ വോട്ടർമാർ അങ്ങേയറ്റം ബോധവാന്മാരാണ്. തങ്ങൾ നൽകുന്ന വോട്ട് വെറുതെയാകുമെന്ന് തോന്നിയാൽ അവർ നൽകുന്ന തിരിച്ചടി കഠിനമായിരിക്കും.
അധികാരം എന്നത് ജനങ്ങളെ സേവിക്കാനുള്ള ഉപാധിയാണെന്ന് മറന്ന്, അത് കേവലം കസേരകളിയായി മാറ്റുന്ന നേതാക്കൾ ഗാന്ധിജിയുടെയും നെഹ്റുവിന്റെയും പാരമ്പര്യത്തെയാണ് അപമാനിക്കുന്നത്. വോട്ട് എണ്ണി തീരുന്നതുവരെയെങ്കിലും ഒന്ന് ക്ഷമിക്കാൻ ഇവർക്ക് കഴിയുന്നില്ലെങ്കിൽ, അധികാരം കിട്ടിക്കഴിഞ്ഞാൽ ഇവർ എങ്ങനെയായിരിക്കും പെരുമാറുക? വകുപ്പ് വിഭജനത്തിലും മന്ത്രിസ്ഥാനങ്ങളിലും ഉണ്ടാകാൻ പോകുന്ന തർക്കങ്ങളുടെ ഒരു ചെറിയ സൂചന മാത്രമാണ് ഇപ്പോൾ നാം കാണുന്നത്. കമലനാഥും ജ്യോതിരാദിത്യ സിന്ധ്യയും തമ്മിലുള്ള പോര് എങ്ങനെയാണ് മധ്യപ്രദേശിൽ ബി.ജെ.പിക്ക് വഴിമാറിക്കൊടുത്തത് എന്നത് മറക്കരുത്. കേരളത്തിലും അത്തരമൊരു സാഹചര്യം ഉണ്ടായാൽ ചരിത്രം ഇവർക്ക് മാപ്പ് നൽകില്ല.
ആറുമാസം തികയുന്നതിന് മുൻപേ ജനങ്ങളെക്കൊണ്ട് തലയിൽ കൈവെച്ച് പ്രാർത്ഥിപ്പിക്കുന്ന രീതിയിലേക്കാണ് കാര്യങ്ങൾ നീങ്ങുന്നത്. 'ടീം യു.ഡി.എഫ്' എന്ന് പറഞ്ഞ് വോട്ട് വാങ്ങിയവർ, ഭരണത്തിന്റെ പടിവാതിൽക്കൽ എത്തുമ്പോൾ വ്യക്തിഗത നേട്ടങ്ങൾക്കായി പോരടിക്കുന്നത് അങ്ങേയറ്റം ദൗർഭാഗ്യകരമാണ്. ഈ നാടകങ്ങൾ അവസാനിക്കേണ്ടതുണ്ട്. പക്വതയുള്ള ഒരു നേതൃത്വത്തിന് മാത്രമേ കേരളം പോലുള്ള ഒരു സംസ്ഥാനത്തെ മുന്നോട്ട് നയിക്കാൻ കഴിയൂ. വി.ഡി. സതീശനായാലും രമേശ് ചെന്നിത്തലയായാലും കെ.സി. വേണുഗോപാലായാലും, അവർ ജനാധിപത്യപരമായ മര്യാദകൾ പാലിക്കാൻ ബാധ്യസ്ഥരാണ്. സാധാരണക്കാരന്റെ പ്രശ്നങ്ങൾ പരിഹരിക്കാനാണ് ഭരണമെന്നും, അത് ഗ്രൂപ്പുകൾക്കിടയിൽ വീതം വെക്കാനുള്ളതല്ലെന്ന് ഇവർ തിരിച്ചറിയണം. രാഷ്ട്രീയത്തിലെ ഈ ചതുരംഗക്കളികൾക്കിടയിൽ ബലിയാടാവുന്നത് എന്നും സാധാരണ വോട്ടർമാരാണെന്ന സത്യം ബാക്കി നിൽക്കുന്നു. നേതാക്കൾ ശാന്തരാണെന്ന് പുറമേക്ക് പറയുമ്പോഴും ഉള്ളിൽ പുകയുന്ന അധികാരമോഹം കേരളത്തിന്റെ രാഷ്ട്രീയ അന്തരീക്ഷത്തെ മലീമസമാക്കുകയാണ്. ഈ പ്രവണത അടിയന്തരമായി തിരുത്തപ്പെട്ടില്ലെങ്കിൽ, ലഭിക്കാൻ പോകുന്ന വിജയം പോലും ഒരു പരാജയമായി മാറാൻ അധികം സമയം വേണ്ടിവരില്ല. അതുകൊണ്ട്, നാലാം തീയതിക്കായി കാത്തിരിക്കുക, ജനവിധി അംഗീകരിക്കുക, എന്നിട്ടാകാം കസേരക്കളി. അതിന് മുൻപേ നടത്തുന്ന ഈ കോമാളിത്തരങ്ങൾ കേരളത്തിലെ പ്രബുദ്ധരായ ജനങ്ങളോടുള്ള വെല്ലുവിളിയാണ്.
